ചന്ദ്രോപരിതലത്തിൽ ഇന്ത്യയുടെ കയ്യൊപ്പ് പതിപ്പിക്കാൻ റോവർ പുറത്തേക്ക്; ഇനി ചന്ദ്രനെ തൊട്ടറിയും

ബെംഗളൂരു: കൂടുതല് പരീക്ഷണങ്ങള്ക്കായി വിക്രം ലാന്ഡറില് നിന്നും പ്രഗ്യാന് റോവര് ചന്ദ്രോപരിതലത്തിലേക്ക്. ചന്ദ്രയാന് 3ന്റെ പേടകം ചന്ദ്രനില് സോഫ്റ്റ് ലാന്ഡ് ചെയ്ത് നാല് മണിക്കൂര് മുതല് ഒരു ദിവസം കൊണ്ട് റോവര് ചന്ദ്രോപരിതലത്തില് പര്യവേഷണത്തിനായി ഇറങ്ങുമെന്നാണ് ഐഎസ്ആര്ഒ ചെയര്മാന് എസ് സോമനാഥന് വ്യക്തമാക്കിയിരുന്നത്. വിക്രം ലാന്ഡറിന്റെ ചന്ദ്രോപരിതലത്തില് തൊട്ടതോടെ ഉയര്ന്ന പൊടി ഇല്ലാതാകുന്നതുവരെ റോവര് പുറത്തിറക്കാന് കഴിയില്ല എന്നതാണ് തടസ്സമായി മുന്നിലുണ്ടായിരുന്നത്. പൊടി പടരുന്നതിന് മുമ്പ് റോവര് പുറത്തെടുത്താല്, അത് റോവറിലെ ക്യാമറകള്ക്കും മറ്റ് സെന്സിറ്റീവ് ഉപകരണങ്ങള്ക്കും കേടുവരുത്തുമെന്നതിലും ശാസ്ത്രജ്ഞര്ക്ക് ആശങ്കയുണ്ടായിരുന്നു. ഇതായിരുന്നു റോവര് പുറത്തിറങ്ങാന് അഭിമുഖീകരിച്ച തടസ്സം. അശോകസ്തംഭവും ഇസ്റോയുടെ ചിഹ്നവും റോവർ ചന്ദ്രോപരിതലത്തിൽ കോറിയിടുന്ന ദൗത്യവും റോവർ പൂർത്തിയാക്കും.

ലാന്ഡര് സോഫ്റ്റ്ലാന്ഡ് ചെയ്ത് മണിക്കൂറുകള്ക്കകം തന്നെ പ്രഗ്യാന് റോവറിനെ ചന്ദ്രോപരിതലത്തില് ഇറക്കാന് സാധിച്ചതും ഐഎസ്ആര്ഒയുടെ നേട്ടമായി. ആറ് ചക്രമുള്ള റോബോട്ടിക് വാഹനമായ പ്രഗ്യാന് റോവറിന് ഒരു ചാന്ദ്രദിനമാണ് ആയുസുള്ളത്. ഭൂമിയിലെ 14 ദിവസങ്ങളാണ് ഒരു ചാന്ദ്രദിനം. 26 കിലോഗ്രാം ഭാരമുള്ള പ്രഗ്യാന് റോവറില് രണ്ട് പരീക്ഷണ ഉപകരണങ്ങളാണ് ഉള്ളത്. LIBS (LASER Induced Breakdown Spectroscope) ആണ് ഒരു പേലോഡ്. ചന്ദ്രനിലെ മണ്ണിന്റെയും പാറകളുടെയും ഘടകങ്ങളെക്കുറിച്ച് വിവരം ഈ പേലോഡ് നല്കും. APS ( Alpha Particle -ray Spectrometer) ആണ് രണ്ടാമത്തെ പേലോഡ്. ചന്ദ്രോപരിതലത്തിലെ രാസപദാര്ഥങ്ങളുടെയും ഖനിജദ്രവ്യങ്ങളുടെയും സങ്കലനം സംബന്ധിച്ച പരീക്ഷണമായിരിക്കും നടത്തുക.

ചന്ദ്രൻ്റെ ദക്ഷിണധ്രുവത്തിൽ ലാൻഡ് ചെയ്ത വിക്രം ലാൻഡറിന് ബഹിരാകാശ ശാസ്ത്രത്തിന്റെ പിതാവ് വിക്രം സാരാഭായിയുടെ സ്മരാണര്ത്ഥമാണ് ആ പേര് നല്കിയത്. 1749.86 കിലോഗ്രാമാണ് വിക്രം ലാന്ഡറിന്റെ ഭാരം. ചന്ദ്രയാന് 2വിന്റെ ഓര്ബിറ്ററുമായാണ് ലാൻഡർ ആശയവിനിമയം നടത്തുക. ഒരു ചാന്ദ്രദിനമാണ് ആയുസ്. ഒരു ചാന്ദ്രദിനമെന്നത് ഭൂമിയിലെ 14 ദിവസങ്ങളാണ്. നാല് പരീക്ഷണ ഉപകരണങ്ങളാണ് ലാന്ഡറിലുള്ളത്.

ഉപരിതലത്തിലെ പ്ലാസ്മ സാന്ദ്രതയും അതിലെ മാറ്റങ്ങളും കണ്ടെത്തുന്നതിനായുള്ള RAMBHA LP (Radio Anatomy of Moon Bound Hypersensitive ionosphere and Atmosphere) എന്ന പേലോഡാണ് ആദ്യത്തേത്. ChaSTE (Chandra's Surface Thermo physical Experiment) എന്ന പേലോഡാണ് രണ്ടാമത്തേത്. ധ്രുവ മേഖലക്ക് സമീപത്തെ ചന്ദ്രോപരിതലത്തിലെ താപ വസ്തുക്കളെ സംബന്ധിച്ച വിവരം ശേഖരിക്കുക എന്നതാണ് ഈ പേലോഡിന്റെ ദൗത്യം. ചന്ദ്രനില് ലാന്ഡര് ഇറങ്ങുന്ന സ്ഥലത്തും പരിസരങ്ങളിലുമുള്ള ഭൂകമ്പതരംഗങ്ങളെ അളക്കുക എന്നതാണ് നാലാമത്തെ പേലോഡായ ILSA (Instrument for Lunar Seismic Activity)യുടെ ദൗത്യം. നാലാമത്തെ പേലോഡായ NASA Playload, LRA - LASER Retroreflector Arrayയുടെ ദൗത്യം ഭൂമിയും ചന്ദ്രനും തമ്മിലുള്ള ദൂരനിര്ണയ പഠനങ്ങള് നടത്തുക എന്നതാണ്.

നേരത്തെ വൈകുന്നേരം 6.04നായിരുന്നു കാത്തിരിപ്പിനൊടുവിൽ വിക്രം ലാൻഡർ ചന്ദ്രനെ തൊട്ടത്. ഇതോടെ ചന്ദ്രൻ്റെ ദക്ഷിണധ്രുവത്തിൽ സോഫ്റ്റ് ലാൻഡ് ചെയ്യുന്ന ആദ്യത്തെ രാജ്യമായി ഇന്ത്യ മാറിയിരുന്നു. ദൗത്യ വിജയത്തോടെ ചാന്ദ്ര ഗവേഷണത്തിൽ ഐഎസ്ആർഒയുടെ പ്രധാന്യം കൂടിയാണ് ബഹിരാകാശ ഗവേഷണ രംഗത്ത് അടയാളപ്പെടുത്തപ്പെട്ടത്. ചന്ദ്രയാൻ-3 ജൂലൈ 14നാണ് ശ്രീഹരിക്കോട്ടയിലെ സതീഷ് ധവാൻ സ്പേസ് സെന്റ്ററിൽ നിന്നും വിക്ഷേപിച്ചത്. ചന്ദ്രോപരിതലത്തിൽ സോഫ്റ്റ് ലാൻഡിംഗ് നടത്താനുള്ള രണ്ടാണ് ശ്രമത്തിലാണ് ഇന്ത്യ വിജയം കണ്ടിരിക്കുന്നത്. ജൂലൈ 14ന് വിക്ഷേപിച്ച ചന്ദ്രയാൻ 3 പേടകത്തിലെ ലാൻഡർ മൊഡ്യൂൾ ഓഗസ്റ്റ് 17നാണ് പ്രൊപ്പൽഷൻ മൊഡ്യൂളിൽ നിന്ന് വേർപ്പെട്ട് സ്വതന്ത്ര സഞ്ചാരം തുടങ്ങിയത്.